[ داڵغە ]

ـــ ...ئێستا دەچم بانگی دەكەم، ئێوە فەرمون دانیشن،

لەكتێب فرۆشیەكەدا دانیشتم.دەبێ زۆر شڵەژابێ،لە مێژە نەمدیوە ،بێتە ژور حەتمەن پێدەكەنێ. پێدەكەنی، بە زۆری دەیویست خۆی لە بێقەراری حەشار با، دەنگێك دەڵێی: " ئا، تۆ لە كوێ و ئێرە لە كوێ؟" بەزردەخەنەیێك وڵامم دابوویتەوە. زەردە خەنەكەی هەراسناكی كردبووی، هەمیشە وای بۆدەچووم كەبتبینمەوە هەراسناكیت و ئەو پرسیارە دەپرسی. لێی پرسیبوی، بۆهێندە دەورەم ئەیەیت؟. ماشینەكە دەوری مەیانەكەی نەدابوەوە لە شار هاتبووینەدەر. بەیانیان كەخەڵك لەشار دەهاتنەدەر تا ئێوارە لەقوژبنێكا خۆیان حەشار ئەداو بەدزیەوە دەچوونەوە شار. شار ئێستا ئاساییەو هەركەسێ سەری بە كاری خۆیەوە قاڵە، خوسرەو سەری بە كاروباری زەماوەندی ئاڵاوە قاڵ بوو، یەكەم جار ئاڵات لە خیابان دیبوو، لەماشینەكەیا كە تۆم دی ئاڵۆز هاتیتە بەر چاوم، لەچاوتا ئەوەم دەدی كەڕۆژێك دەتبینمەوە، لەڕۆژنامەكەی سەر ویترینەكەدا چاوم ترازا سەر ڕستەی "ڕێژەی خۆ سوتانی ژنانی كورد بەرەو سەرەوە خوی...لاپەرەی2" لاپەڕەی كتێبەكانی خاڵەم كە هەڵ ئەداوە وێنەكەی لە بەر چاوما ڕەنگی دەگرت. وێنەكەی دابووە دەست تۆ و ڕۆشتبوو. كە لە دیوەكە، دەربازیان كردین،تۆ رۆیشتی و ئەو هەموو قسانەت لا جێ هێشتم، جێی هێشتی پاش ئەوەی بەر جنێوی دایت، جنێوت بە ئەردو ئاسمان ئەدا، سەریان هەڵدەبری كە لە ئاسمانا خەتەكەیان دەدی دەیان گوت: "هات و خۆیان دەشاردەوە" دەمزانی خۆت لە پرسیارەكانم دەشاریەوە ،كە پرسیبووم بۆ ئەوەندە كزی؟ هەموو شتێكت لا دركاندم، خاڵم هیچی نە دركاندبوو، خاڵم زۆر شتی دەزانی، زۆر شتم لە مەڕ تۆوە دەزانی، دەم زانی ئەگەر ئەو قسانەت نەكردایە دەتەقایتەوە، كە بۆمبەكە تەقیەوە خەڵكی بە هەڵەداوان هاتبوونەدەر .ئەو دەنگە زۆر غەریب بوو، زۆر لام غەریب بوو نە بەقەد دیتنی شەڵەژاوی خەڵكی كەبۆ خوار گەرەكە هەڵاتبوون. هەڵاتبووی لە چنگ ئەو ئەنگوستانەی ڕوومەتیان نەوازش دابووی، هەمیشە بیرت كردبوەوە ئەگەر نوازش بكرێیت ئۆخژنیت پێدەبەخشرێ، بیری ئەوەت نەكردبوو كەهەراسناك ببیت، دایكم كەهاتبوەوە بۆماڵ هەراسناك بوو:" ئەك دەستم شكێ بو دادە حەفسە" مورادی حەمام چی هەرچی جارێك كە پووكێكی لە بافورەكە ئەدا حەفسەی لە بەر چاوا زیندوو دەبوەوە كە مەمكی لە زاری ئاڵادا بوو، ئاڵاش كە خۆی سووتان موراد لێوی بە بافورەكەوە بوو، سێ ساڵ دەبێ كە بافورە شكاوەكەی لە سووچێكا كەوتووە .كەوتبوویت بە عەرزا كە ئەو هەواڵەیان بۆ هێنایت، دەمزانی كە تەواوی ددانەكانت وەك موراد زەرد دەبێ، زەرد هەڵگەرابووی،كوتبووت: ئاڵا چی بووە ؟ زۆر شت ڕووی دابوو، لەناخیا شاردبویەوە .خاڵەمیان لە ژێر زەمینەكە شاردەوە، هەموو ڕۆژێك دەچوومە لای، چووبوویتە لای ماڵی ئاڵا تا پێی بڵێی: "كچی باش ژیانت تێك مەدە..." كە ژێر خانەكەیان تێك دا كۆمەڵێك كتێب وەدەر كەوت، كە وەدەر كەوت خۆت لێ شاردەوە نەكا تاسەت بكا وپیلەت پێبگرێ، پیلەیان پێ گرتبوو خاڵم دەڵێم، دەڵێم: "من كەس ناناسم"خاڵم زۆركەسی دەناسی."غەلەت میكۆنی نەمی شناسی" شناسی ئازادنەبوویت بە تەما بووی بە خوسرەوا بەئازاد راگەیێنی كەئاڵا لە كۆڵت ناكەوێتەوە، ئاڵایان كە ناشت ئازاد پێكەنی بوو، هەرجارێك كە لە خیابان دەم دیت پێدەكەنی، بەدەستە سووتاوەكانی دەیكێشا بەسەریا، بۆنی گۆشتی سووتاو گەرەكی داگرتبوو،ئاڵا چڵە شەمچەكەی داگیرسان گڕێك لەشوشەی حەمامەكەوە دبینرا كەسەمای دەكرد ئازاد دیبووی خۆی كردبوو بەحەمامەكەیا، ویستبووی وەیكوژێنێ ونەیتوانیبوو، دەستی سووتابوو، دەستی بۆ لای كوڵمت كێشابوو ونەوازشی كردبووی و خۆت كێشابوەوە، دستت كێشابوو بۆ زەبتەكە و هەڵت كردبوو، شریتەكەی خستبوە سەر زەبتەكەو شریتی دوهەم لەنیوەیا بوو و دەڕۆیشت، بۆنی سووتاوی بەتوندی ماڵەكەی دەتەنی. خەستەخانە لانی كەم مانگی جارێك بۆنی گۆشتی سووتاوی لەخۆ دەگرت، لە خۆوە گرتبوویانین ولەماشینەكە دایانگرتبووین، كە كوتی: "كارتی شناسایی" دەمە بە دەمێمان لەگەڵ كردبوو، كارتی زەماوندەكەت كە بۆ هات ئەرخەیان بوویت كە هەموو شتێك كۆتایی پێ هاتووە، كەشریتەكانت بۆ ئازاد نارد تازە شتەكان سەری هەڵدا، شریتەكەت هەڵگرتبوو بۆ تەنگانە ،خەڵكی تەنگیان پێ هەڵچنرابوو، خووشیان بەوتەنگانە گرتبوو، كەگرتیانین لە دیوێكی چكۆلەیا ڕایان گرتین، ماڵی ئێمە و پێنج بنەماڵەی دی لە دیوێكا دەژیان، ئاڵا بەو ژیانەخۆشەی كە ئازاد بۆی سازاندبوو قاییل نەبوو، لە دیوە چكۆلەكەیا دۆستایەتیمان سازا، لەگەڵ ئازادا نەدەسازا، ئازاد لە كۆڵانەكەیانا بەرۆكی پێگرتی، بەرۆكیان بەم و بەو دەگرت، ئاڵا بەرۆكی بەر نە ئەدای، دواهەمین وێنەی دادە حەفسە و ئاڵا بەرۆكی مورادی بەرنەدەدا. "بەرۆكم وێڵ كە لە كوڵم وەكەوە من ناتوانم لەتەكتا بەینایەتیم هەبێ"، لەپۆلی یەكەوە لەگەڵ خوسرەوا بەینایەتیت بوو، ڕۆژنامەكە پۆلێنی ڕادەی خۆسوتانەكانی نەكردبوو، دەسووتان و دوكتۆر دەیگوت: (( 68 لەسەد48 لەسەد 75 لەسەد 81 لەسەد 59 لەسەد 86 لەسەد و..." سەد لە سەد دەت زانی، ئەو شریتانەی كەتۆ داوتە بە ئازاد هۆی خۆسووتانی ئاڵایە،ـ هۆی هەموو خۆسووتانەكان دڵداری نیەــ ئاڵا دڵداری لەگەڵ زۆر كەسا كردبوو، بەشوێن زۆر كەسا دەگەڕان ،زۆر وەدووی خاڵەما گەڕابوون، خاڵەم دەیویست لەشار نەمێنێ، بۆیە ژێر زەمینەكەی جێ هێشت، دایكم بەدوای خاڵما فرمێسكی لە چاو دەتكا. ئەو چەتیوە حەیای تكابوو، تنوك تنوك نەوتەكە لەسەر جل و بەرگەكەی جۆگەی دەبەست و تەواوی لە شی دەگرتەخۆ، لەشی باوكم شەڵاڵی ئارەق بوو كە درگاكەمان لە ڕێبوار كردەوە، ڕێبوار زرم لە درگاكەی ئەدا، زرم گوشی تەلەفونەكەت دا بە ئەردا، تف لە گەروویا وشك بوو، دایكم دەستی بە بیست لیتریە نەوتەكەوە وشك بوو،ئاڵا بیست لیتریەكەی لە تەك شەمچەیێك لەحەمامەكەیا دانابوو،ــ هەر كەسێك كە بیهەوێ خۆ بسووتێنی ناچێتە حەمام ــ چووبووینە بەردرگا تا خاڵە بەرێ كەین. كە لەگەڵ ڕێبوارا بە ڕێ كەوتن باوكم زوو پاڵی پێوە ناین تا بچینە حەوشەكە، لەسوچێكی حەوشەكە ڕێبوار بەگوێی باوكمدا چرپاندبووی كە خاڵمیان گرتوەوە، ئەویش بە هەر جۆرێك بێت خۆی درباز كردووە، باوكم ڕێبواری دەرباز كرد، خاڵەم لە تاقمەلەجووت دربازنەبووبوو، خوسرەو تاقمەلە جووتی زۆر پێ خۆش بوو، تاقمە لە جووت ؟ هەمیشە دەت گوت دەستی ڕاست. ئاڵایان لەلای ڕاستی دادە حەفسەوە ناشت، مورادیش لە سوچی چەپەوە ، مورادی حەمام چی واقی وڕما كە گوتیان ئاڵا خۆی سووتانوەو بە بافورەكەوە درابوو بە ئەرداو بافورەكە شكابوو، شوشەی جیپەكە شكا و ماشینەكە تەقیەوە و خاڵم نارنجوكەكەی تری هەڵگرتبوو، غاری كردبوو، خاڵمیان لەو شوێنەی كە غار غارێنمان دەكرد فرێ دابوو، شوشە ئودكڵۆنەكەی كەخوسرەو لە زەماوەندەكەیا لە دەستی ئازادی ڕفاندبوو، پێی دایت، فڕێت دا،پێت پێكەنیبوو بیری پێكەنینەكەی ئاڵاكەوتبوویەوەو كە لە سەرمێزی بووكێنیەكەی، دەمو چاوی ڕەنگاندبوو،خەلكێكی زۆر دەوریان دابوو، خەڵكێكی زۆر لەگەڵ مەیتەكەی خاڵەما بوون و مەیتەكەیان ناشتبوو، فرۆكە دەهات ودەرۆشتەوە، خەڵكیان دەناشت، توپ بەر شاردەكەوت، خەلكیان دەناشت .

جەنازەیێك كە خەڵكێكی زۆری لەگەڵا بوو بە بەر دوكانەكەیا خەریك بوو تێدەپەری،

دەلێم: "تو لەكوێو ئێرە لە كوێ؟"

ـــ ها...

ـــ " دەڵێم چۆن بو هاتیتە ئێرە؟" ـــ تماشایێكی دیانەكانی دەكەم تا بزانم زرد نەبووەـــ" چۆن زانیت دوكانم داناوە ولێرم؟"

ــ برادەران كوتیان. كارێكی باشت كردوە كتێب فرۆشیت داناوە ،ڕاستی ئەوەمەیتی كێیەوا دەیبەن؟

ـــ "دەڵێن:" بوكی ماڵی دوكتۆر سەعیدە وخۆی سووتانوە"."

ـــ حەتمەن بەنەوت...

ــ" نا شێری گازی كردوەتەوەو... "

ـــ تەح هەرناكەوێتەوە..

ـــ "چی ؟"

ــــ هیچ ؟

ـــ "بوهەستای؟خۆ دوو خولكە نابێ هاتووی."

ـــ وەڵا كارم هەیە دەبێ بڕۆم، روژنامەكە هەڵدەگرم ولە كتێب فرۆشیەكەی دێمە دەر و بە پێچەوانەی دەستەی بەرێكەرانی مەیتەكە دەرۆم و ڕێژەی خۆ سووتانی ژنانی كورد... لەلەپی دەستما ئارەق دای دەگرێ .

تەواو بانە

سدیق کریمپور

خانه کارگاه داستان شعر ‏مقاله‌ گزارش گفتگو‌ کتاب فستیوال پیوندها